അവൾ ഋതുവാണ്. 

വസന്തവും വർഷവും 

ശിശിരവും ഹേമന്തവും 

സമയത്തിന്റെ ലഘുകണികകൾക്കുള്ളിൽതന്നെ

മാറി മാറി വരുന്നൊരുവൾ. 

അവൾക്കനുസരിച്ചുള്ള മാറ്റങ്ങളിലാണ് 

ജീവിതം എന്നിലൂടെ കടന്നു പൊയ്ക്കൊണ്ടിരിക്കുന്നത്. 

ഞാൻ വിടരുകയും തളിർക്കുകയും 

പൊഴിയുകയും ചെയ്യുന്നതിന് 

അവളല്ലാതെ മറ്റൊരു കാരണമില്ല.

  
ഒരു പെൺകുട്ടിയെ പ്രണയിക്കുകയെന്നാൽ 

അവൾ കടന്നുപോകുന്ന ഋതുവിനെ 
അറിയുകയെന്നതാണ്.

അതറിയാതെ അവളെ പ്രണയിക്കാനാവില്ല!!