Sunday, December 15, 2013

അവള്‍

നീ എന്നോടൊപ്പം ഒഴുകുന്ന പുഴയാണ്
അവള്‍ എന്നിലേക്കൊഴുകുന്നതും

ഞാനിലെങ്കില്‍ അവള്‍ക്കൊഴുകിചേരാന്‍ സമുദ്രങ്ങളില്ലാതെ പോകും
അവളുടെ യാത്ര എന്നിലേക്കാണ്
ഞാനിലെങ്കില്‍ അവള്‍ക്കൊഴുകാന്‍ ലക്ഷ്യങ്ങളില്ലാതെ പോകും
ഞാനില്ലാതെ അവള്‍ക്കൊഴുകാനാവില്ല..

നീ എന്നോടൊപ്പം ഒഴുകുന്ന പുഴയാണ്
അവള്‍ എന്നിലേക്കൊഴുകുന്നതും.

Sunday, December 8, 2013

അര്‍ദ്ധാംഗനി

ശൈത്യരാത്രിയില്‍   കനലിന്റെ   ഉറവയില്‍നിന്നും
ഒഴുകിവരുന്ന   അഗ്നിപോലെയായിരുന്നു   അവളുടെ   ചുംബനം
------

നിന്റെ ചുംബനത്താല്‍ എന്റെ ചിറകുകള്‍ നനഞ്ഞിരിക്കുന്നു
എന്റെ ശ്വാസം നിന്റെ അഗാധതയിലേക്ക് ആഴ്ന്നുപോയിരിക്കുന്നു.

ഒരിക്കലും തീരാത്ത ചുംബനങ്ങളോടെ  നിന്നരികിലിരിക്കാന്‍..
ഒരു മഴതുള്ളിയില്‍ നിന്നും  സമുദ്രത്തെ സൃഷ്ടിക്കുന്ന  പുഴയുടെ ഉറവയാകുവാന്‍
എനിക്ക് നിന്നെ ചുംബിക്കണം;

എന്റെ ഹൃദയം നിശബ്ദമാകും വരെ..
കണ്ണുകളില്‍ നിന്ന്
പ്രാണന്‍ പറന്നുപോകും വരെ..
എല്ലാ ഞരമ്പുകളില്‍ നിന്നും ശ്വാസമെടുത്ത്
ജീവ്ന്റെ ഒരു കണിക പോലും
എന്നില്‍ അവശേഷിക്കാത്തവിധം
ഹൃദയത്തില്‍ അവസാന സ്പന്ദനത്തിന്റെ
ശാന്തതയോടെ എനിക്ക്  ചുംബിക്കണം

പിന്നീട്..

പ്രണയം മൗനമായിരിക്കുന്ന
നിന്റെ മനസിന്റെ കൂടാരത്തില്‍
അതിഗൂഡവും മനോഹരവുമായ നിന്റെ ഗര്‍ഭത്തില്‍..
ഞാനുറങ്ങട്ടെ..
നിന്റെ സ്പന്ദനങ്ങളില്‍ പാതി എനിക്കായിരിക്കും
നിന്റെ എല്ലാ ഞരമ്പുകളും എന്നിലേക്കായിരിക്കും
നിനക്കെന്നെ ശ്വസിക്കാം..  കേള്‍ക്കാം..

Monday, October 7, 2013

നിനക്ക്  ഞാനൊരു
ചിറകെടുത്തുവച്ചിട്ടുണ്ട്..
എന്നോടൊപ്പം
അടുത്ത
ജന്മത്തിലേക്ക്
യാത്ര ചെയ്യാന്‍..

Monday, June 3, 2013

കൗമാരം

എന്റെ ചില്ലകളില്‍ സ്വപ്നങ്ങള്‍ പൂത്തു തുടങ്ങിയതും
വരികളില്‍ പ്രണയം നിറയാന്‍ തുടങ്ങുന്നതും അപ്പോഴാണ്

യാത്ര ചെയ്യാന്‍ ഇഷ്ടമാണെന്ന് തിരിച്ചറിഞ്ഞതും
രാത്രികളെ ഇഷ്ടപ്പെടാന്‍ തുടങ്ങിയതും അപ്പോഴാണ്

സിനിമാപരസ്യങ്ങളില്‍ കണ്ണുകളുടക്കിയതും
കണ്ണടച്ച് ഇരുട്ടാക്കി സിനിമയ്ക്ക് പോകാന്‍ തുടങ്ങിയതും അപ്പോഴാണ്

നിന്നെ പ്രണയിക്കാന്‍ തുടങ്ങിയതും
നിറങ്ങളെ ശ്രദ്ധിക്കാന്‍ തുടങ്ങുന്നതും അപ്പോഴാണ്

നിന്റെ ഒരു നോട്ടത്തിനായ് കണ്ണുകള്‍ കാത്തിരുന്നതും
നിന്റെ ചിലമ്പലുകള്‍ ഹൃദയത്തിന്റെ വേഗതകൂട്ടിയതും
ഞാനൊരു അന്തര്‍മുഖനാണെന്ന് മനസിലാക്കീയതും അപ്പോഴാണ്

പറയുന്നതിനും കേള്‍ക്കുന്നതിനും ഉപരി
നിനക്കും എനിക്കുമിടയില്‍
ഹൃദയം സംസാരിക്കാറുണ്ടെന്നറിഞ്ഞതപ്പോഴാണ്

നിശബ്ധത ഒരു ഭാഷയാണെന്നറിയുന്നത് അപ്പോഴാണ്..
അന്നു മുതലാണ്
ഞാന്‍ എന്നെ തനിച്ചാക്കാന്‍ തുടങ്ങുന്നതും..

Wednesday, May 29, 2013

..

ഒരു മഴ നനയണമെന്നേ ഞാന്‍ വിചാരിച്ചുള്ളൂ..
അതില്‍ ഒലിച്ചു പോകുമെന്ന് മനസിലായത്
നിന്നെ പ്രണയിച്ചതിനു ശേഷമാണ്..!

Thursday, April 18, 2013

എനിക്കറിയാത്ത ഒരുപാട് വഴികളുണ്ട്
ഈ പ്രകൃതിയില്‍..
അതിലൊന്ന്
നിന്നില്‍ നിന്നും എന്നിലേക്കുള്ളതാണ്....
അതറിയും വരെ
ആ വഴിയും ഞാനും
നിനക്ക് അപരിചിതമായിരിക്കും.
പകലിനു നക്ഷത്രങ്ങള്‍ അപരിചിതമായിരിക്കുന്ന പോലെ..

Sunday, February 24, 2013

നീ ആ പൂവിനെ നോക്കി ചിരിച്ചല്ലോ
എന്തേ എന്നെ നോക്കിയില്ല
ഒരു പൂവിന്റെ ഹൃദയമാണ് എനിക്കുള്ളതെന്ന്
നീ.. അറിയാതെ പോയോ.

Tuesday, February 5, 2013

നിന്നിലെ ഞാന്‍

ഇന്നലെ പുലര്‍ച്ചെ ഞങ്ങള്‍ ഒരു പൂവ് അന്വേഷിച്ചിറങ്ങി..
ഇതുവരെ ആരും കാണാത്ത ഒരു പൂവ്
ഇന്നു പുലര്‍ച്ചെ അതു ഞങ്ങളെ തേടിവന്നു..

വിടരണോ കൊഴിയണോ എന്നറിയാതെ ആ പൂവ് ഞങ്ങളെ നോക്കി.
കാലം ചലിക്കുന്നത് അത് ഇനിയും അറിഞ്ഞിട്ടില്ല.

കാലത്തിന്റെ സ്പന്ദനങ്ങള്‍ അതിനെ ഇനിയും സ്പര്‍ശിച്ചിട്ടില്ല..
പ്രണയം പോലെ അതിപ്പോഴും കാലത്തിനതീതമായി നില്‍ക്കുന്നു.

കാലം ഉണ്ടെന്ന് തന്നെ അറിയാതെ ആ പൂവ്..

ഇപ്പോള്‍ അവളുടെ സമുദ്രത്തിനുള്ളില്‍ ഒരു ചിപ്പിയില്‍ അത് ഉറങ്ങുകയാണ്.
അതിന്റെ സൂര്യനും ഭൂമിയും ജലവും അഗ്നിയും ശ്വാസവും എല്ലാം അവള്‍ തന്നെ..
അവള്‍ ചിന്തിക്കുന്നതും കാണുന്നതുമെല്ലം ആ പൂവ് അറിയുന്നുണ്ട്

ആ പൂവിനോട് എനിക്ക് അസൂയ തോന്നുന്നു..
എനിക്കും നിന്റെ ആ കൂടാരത്തില്‍ ഉറങ്ങണം..വിടരണം..

നിന്റെ ചിന്തകളും പ്രവര്‍ത്തികളും എല്ലാം ഞാനുമറിയും..
ഒരു മഴ നനഞ്ഞാല്‍ ..
നിന്നില്‍ ഒരു വെയില്‍ പെയ്താല്‍ ..
നിന്റെ കണ്ണില്‍ ഒരു തിരയിളകിയാല്‍ .. എല്ലാം..
നീയില്ലാതെ ഞാനില്ലല്ലോ.. നിന്നിലൂടെ ഞാന്‍ കാലത്തിനതീതനായിത്തീരും
ഇനിയും കാലത്തിന്റെ സ്പന്ദനങ്ങളറിയാത്ത ആ പൂവ് പോലെ..

നാളെ നീയും ഞാനുമുണ്ടാവില്ല..
എങ്കിലും നമ്മുടെ ഈ പ്രണയം പ്രപഞ്ചം ഉള്ളടുത്തോളാം കാലം നിലനില്‍ക്കും..

അതെ ആ പൂവ് വിടര്‍ന്നു കഴിഞ്ഞു..
നാളെ അതു കൊഴിഞ്ഞു പോയെന്നാലും അതിന്റെ യാത്ര അവസാനിക്കുന്നില്ലല്ലോ
അതു നമ്മളിലേക്ക് വീണ്ടും വരുന്നതു വരെ നമുക്ക് കാത്തിരിക്കാം..
അതിനു വേണ്ടിയും അല്ലാതെയും എല്ലാ ജന്മങ്ങളിലും നമുക്കൊരുമിച്ചായിരിക്കാം..

എങ്കിലും എനിക്ക് അസൂയയാണ്.. ആ പൂവിനോട്..നിന്നോട്..എന്നോട് തന്നെ..